പെയ്ത തോരാത്ത മഴയത്ത്...

          ജിദ്ദയില്‍ പെയ്ത മഴയെ കുറിച്ച് കേള്‍ക്കാത്തവര്‍ ഉണ്ടാവില്ല, ഒരുപാട് പോസ്റ്റും അങ്ങനെ ആ മഴയത്ത് ഇറങ്ങി. അന്ന് മഴയത്ത് അരയ്കൊപ്പം വെള്ളത്തില്‍ റൂമിലേക്ക് നീന്തി നടന്നപ്പോള്‍ മനസിലേക്ക് ഒഴുകി എത്തിയത് നാട്ടിലെ മഴക്കാലം തന്നെ. മടി പിടിച്ചു പുതപ്പിനുള്ളില്‍ കിടക്കുന്നതിനേക്കാള്‍ എനിക്കിഷ്ട്ടം മഴയത് ചളിയിലൂടെ അങ്ങനെ നടക്കാനായിരുന്നു, മഴ തിമിര്‍ത്തു പെയ്താല്‍ വെങ്ക്കുളം നിറയും, അയനിക്കാട് ചോലയും,തോടും നിറഞ്ഞൊഴുകും. ഉമ്മ കാണാതെ തോര്‍ത്ത് അരയില്‍ കെട്ടി സാഹസീകമായി രക്ഷപെട്ട് മൂസാക്കന്റെ   പീടികയുടെ പിറകില്‍ ഒളിപ്പിച്ചു വച്ച ചൂണ്ടയും എടുത്ത്, അസ്ക്കരും നവാസും ചെറിയ വലയും കൊണ്ട് വരുന്നതും കാത്തിരിക്കും.

from google

            പിന്നെ കൈതകോട് ക്വോറിയിലേക്കോ അല്ലെങ്കില്‍ തോട്ടിലേക്കോ, 'വീട്ടിലുള്ളവര്‍ക്ക് മുഴുവന്‍ തിന്നാനുള്ള' മീനും ഇന്ന് പിടിക്കണം എന്നും പറഞ്ഞു ഒരു പോക്ക്. ആദ്യം മണ്ണിരയെ തിരഞ്ഞു പിടിച്ചു, എന്നിട്ട ചൂണ്ടയില്‍ കോര്‍ത്ത് മീനിനെയും കാത്തിരിക്കും. എന്നും കിട്ടുന്നത് കുറച്ച് 'അമ്മയിപൂട്ട'(മീന്‍ തന്നെ !) വയറില്‍ കറുപ്പ് വട്ടം വരച്ച മഞ്ഞ നിറമുള്ള നല്ല സുന്ദരന്മാരും സുന്ദരികളും.പിന്നെ പരല്‍, കല്ലന്‍കാരി, കടു, തുടങ്ങിയ ചീള് കേസുകള്‍ !.    

             ഞാന്‍ എങ്ങനെ ചൂണ്ട ഇട്ടാലും മീന്‍ മൈന്റ് ചെയ്യാതെ വാലും ഇളക്കി ഒരു പോക്ക് അങ്ങ് പോവും. ചൂണ്ട ഇടുന്നതിലും എളുപ്പം വല വീശുന്നതാണെന്ന് പറഞ്ഞ്‌ അസ്ക്കര്‍ എനിക്ക് വല വീശാന്‍ പഠിപ്പിച്ചു തന്നു. ആദ്യം ഞാന്‍ വല വീശിയപ്പോള്‍ വല നിറച്ചും ലീലാഫി (ഇതും മീനാണ്). പിന്നീട് ഒരു ദിവസം ഞാന്‍ കാര്യമായി വല വീശി കൊണ്ടിരികുമ്പോള്‍ ക്വോറിയുടെ മുകളില്‍ നിന്നും ഒരു അശരീരി "ഇജ്ജ് ഒരായ്ച്ച ബല ബീസിയാല്‍  ഇതിലെ ചണ്ടി ഒക്കെ അങ്ങട്ട് പോയി കിട്ടും നാളെ നേരത്തെ വരണംട്ടോ", അന്നത്തോടെ അ ഇടപാടും ഞാന്‍ നിര്‍ത്തി.

കൂട്ടാലുങ്ങല്‍ തോട്

               മഴക്കാലത്ത്‌ സ്കൂളില്‍ നിന്നും ഓടി വന്നു ചായ കുടിച്ചെന്നു വരുത്തി തലയില്‍ കുറച്ചു എണ്ണയും പുരട്ടി ട്രൌസറും ഇട്ട്‌ ഗ്രൌണ്ടിലേക്ക് ഓടി ചെല്ലും. ആദ്യം എത്തണം എന്ന വാശിയില്‍ ചിലപ്പോ ചെരിപ്പ് പോലും മറന്നിട്ടുണ്ടാവും, പിന്നെ തകര്‍ത്തു പെയ്യുന്ന മഴയ തോല്‍പ്പിക്കാന്‍ ഞങ്ങളുടെ തകര്‍പ്പന്‍ പന്ത് കളി. ഇരുട്ടുന്നതു വരെ മഴയും കൊണ്ട് കളി, അത് കഴിഞ്ഞു കല്ലുവെട്ടു കുഴിയിലെ കലക്ക വെള്ളത്തില്‍ വിസ്തീരിച്ചൊരു കുളി. ഇങ്ങനെ മഴ കൊണ്ടിട്ടും എനിക്ക് പനിയൊന്നും പിടിച്ചിരുന്നില്ല, ഉമ്മ പറയും എണ്ണ ഇട്ടതു കൊണ്ടാണെന്ന് !

                   അന്നൊക്കെ മഴയത്തുള്ള കളി ഒരു കാരണവശാലും ഞങ്ങള്‍ മുടക്കിയിരുന്നില്ല, ഇന്നിപ്പോ മഴ പെയ്താല്‍ അറിയാതെ 'നാശം' എന്ന് പറഞ്ഞു പോവുന്നു.VKC ഹവായി ചെരുപ്പ് ഇട്ട്‌ നടന്നിരുന്ന  കാലത്ത് റോഡില്‍ വെള്ളം കാണുമ്പോള്‍ വെറുതെ ഒന്ന് കല്‍ കാഴുകിയിരുന്നു, ഇപ്പോള്‍ ഫലസ്തീന്‍ റോഡില്‍ വെള്ളമാണെന്നു പറഞ്ഞു രണ്ടു ദിവസം കമ്പനിയില്‍ നിന്നും ലീവ് എടുക്കുന്ന അവസ്ഥയോളം എത്തി. 'ഇത്രയ്ക്ക് വലുതാവേണ്ടിയിരുന്നില്ല എന്ന് വല്ലാതെ തോന്നുന്നു'!.